रामनउमी चाहे राम नउमी ((हिंदी: राम नवमी)) हिंदू लोगन के एगो तिहुआर हवे जे चइत के महीना के अँजोर में नउमी तिथी के मनावल जाला। मानल जाला कि एही दिने श्री राम के जनम भइल रहे जे हिंदू धर्म में, खासकर के वैष्णव शाखा में, भगवान विष्णु के अवतार मानल जालें। एही दिने चइत के नवरातरो के समापन होला।
राम नउमी के परब के महत्व हिंदू धार्मिक परंपरा में महत्वपूर्ण रहल बा। एह परब के साथे-साथ माँ दुर्गा के नवरातरो समाप्त हो जाला। हिंदू धर्म में राम नउमी के दिन पूजा कइल जाला। राम नवमी के पूजा में पहिले देवता लोग के पानी, रोली आ लेप चढ़ावल जाला, ओकरा बाद मूर्तियन के अच्छत चढ़ावल जाला। पूजा के बाद आरती कइल जाला। कुछ लोग एह दिन उपासो रखेला।[2]
भारत में ई परब श्रद्धा आ विश्वास के साथे मनावल जाला। चैत्र नवरातरो राम नउमी के दिन खतम हो जाला। हिंदू धार्मिक शास्त्रन के अनुसार भगवान श्री राम के जनम एही दिन भइल रहे, एही से भक्त लोग एह शुभ तिथि के राम नवमी के रूप में मनावेला आ पवित्र नदी में नहान क के पुन्य में भाग लेला।
