शाक्त संप्रदाय सभसे मुख्य हिंदू संप्रदायन में से एक हवे जेह में सभसे ऊँच देवता, भा ईश्वरीय पदवी, देवी के दिहल जाला। एह में देवी भा शक्ति के केंद्रीय स्थान ह आ उनुके बिबिध रूप जीवन आ ब्रह्मांड के बिबिध पहलू सभ के नियंत्रण करे लें। एह तरीका से अलग-अलग देवी लोगन के जीवन के अलग-अलग पहलू खातिर जिम्मेदार आ ओह चीज के देवी मान के उनहन लोगन के पूजा कइल जाला। मुख्य देवी लोगन में सभसे बेसी आराधन कइल जाये वाली देवी दुर्गा हई। उनुका बाद पार्वती आ काली रूप के पूजा होला। त्रिदेवी के कांसेप्ट में पार्वती, लक्ष्मी आ सरस्वती के महत्व हवे।
भारत में बौद्ध धर्म के जोर कम हो जाये के बाद डेवलप भइल कांसेप्ट आ परंपरा में कई बौद्ध देवी (महायान) लोगन के भी हिंदू देवी लोगन के साथे शामिल क के दस गो देवी लोगन के मंडली कल्पित कइल गइल जेकरा के दस महाविद्या कहल जाला। इनहन लोगन में तारा, भैरवी, त्रिपुरेश्वरी नियन देवी लोग शामिल बाड़ी । एकरे अलावा लोकल लेवल पर गाँव-गाँव में पूजल जाये वाली ग्रामदेवता लोग एह झुण्ड में शामिल बा लोग जिनकर पूजा शाक्त शाखा में होखे ला।
