ब्लॉग

विकिपीडिया से
(ब्लॉगिंग से अनुप्रेषित)

ब्लॉग (अंग्रेजी: blog, मूल शब्द weblog के छोट रूप) अइसन वेबसाइट होला जेह पर कौनों ब्यक्ति अपना इन्ट्रेस्ट के बिसय पर चर्चा-परिचर्चा चाहे जानकारी देवे वाली चीज समय-समय पर लिखे ला आ ई वेबसाइट सभ वल्ड वाइड वेब पर छपे लीं। समय-समय पर, डायरी में दर्ज करे वाला लिखाई नियर, ई लेख सभ के पोस्ट कहल जाला आ ई आमतौर प उल्टा क्रम में देखलाई पड़े लें; मने की नया पोस्ट ब्लॉग के पन्ना पर सभसे ऊपर लउके लें। एह पोस्ट सभ में खाली पाठ (टेक्स्ट) के रूप में लिखल सामग्री हो सके ला हालाँकि, अक्सरहा इनहना में फोटो, बीडियो आ दुसरे वेबसाइट के चाहे अपने ब्लॉग के दुसरे पोस्ट आ पन्ना सभ के लिंक शामिल कइल गइल होला। ब्लॉग लिखे का काम के चाहे एह क्रिया के ब्लॉगिंग कहल जाला। अइसन लिखाई करे वाला लोग के ब्लॉगर कहल जाला।

ब्लॉगिंग के चलन नब्बे के दशक में शुरू भइल आ एह शुरुआती दौर में ब्लॉग सभ के केहू एकही ब्लॉगर के लिखल चीज होखे। बाद में कई-लेखक वाला ब्लॉग (मल्टी-ऑथर ब्लॉग, एम्एबी) के शुरुआत भइल। अब अइसनो ब्लॉग बाड़ें जे कई लेखक लोगन आ संपादक लोग के टीम द्वारा लिखल आ मेंटेन कइल जालें।

ब्लॉग, आपन निजी वेबसाइट बना के लिखल जा सके लें। एकरे अलावा कई गो ब्लॉगिंग वेबसाइट बाड़ी जे ब्लॉग लिखे आ छपावे के प्लेफार्म के रूप में काम करे लीं। इनहन के सदस्यता ले के इनहना पर आपन निजी ब्लॉग लिखल जा सके ला। वर्डप्रेस, ब्लॉगरटेक्नोराती नियर कुछ ब्लॉगिंग वेबसाइट सभसे परसिद्ध बाड़ीं। कई गो अइसनो वेबसाइट आ सोशल मीडिया साइट बाड़ीं जिनहन पर सीमित साइज के छोट-छोट पोस्ट कइल जा सके ला; अइसन ब्लॉगिंग के माइक्रोब्लॉगिंग कहल जाला। टंबलरट्विटर अइसने माइक्रोब्लॉगिंग वेबसाइट बाड़ीं। एकरे आलावा फेसबुकइंस्टाग्राम नियर सोशल मीडिया प्लेटफार्म पर रेगुलर लिख के पोस्ट करे के भी ब्लॉगिंग में गिनल जा सके ला।

इतिहास

अंग्रेजी के टर्म वेबलॉग (weblog) के रचना जॉर्न बार्जर (Jorn Barger) द्वारा 17 दिसंबर 1997 के कइल गइल रहल।[1] एही के छोट रूप ब्लॉग (blog) के शुरुआत पीटर मेरहोल्ज़ (Peter Merholz) कइलें जे मजाके-मजाक में weblog शब्द के दू हिस्सा में तूर दिहलें आ वी ब्लॉग (we blog) कहलें (जेकर मतलब भइल हमनी के ब्लॉग करी लें) आ एह टर्म के अपना निजी ब्लॉग वेबसाइट Peterme.com पर अप्रैल भा मई 1999 में साइडबार में लगवलें।[2][3][4] एकरे कुछे समय बाद, पाइरा लैब्स के इवांस विलियम्स एह शब्द के इस्तेमाल नाँव आ क्रिया दुनों के रूप में कइलें (ब्लॉग करे के मतलब आपन ब्लॉग के एडिट करे चाहे अपना वेबलॉग पर कुछ पोस्ट करे के अरथ में) आ नया शब्द ब्लॉगर के ईजाद कइलें जेकर संबंध पाइरा लैब्स के ब्लॉगर नाँव के प्रोडक्ट से रहल; एह तरीका से ब्लॉग आ अइसन जुड़ल शब्द पापुलर भइलें।[5]

सभसे सुरुआती कामर्शियल ब्लॉग 1995 में टाइ इंक (Ty, Inc.) द्वारा अस्तित्व में आइल जे एगो बिजनेस-से-उपभोक्ता (business to consumer) वेबसाइट रहे, ई एक नया खंड शुरू कइलस जेकर नाँव ऑनलाइन डायरी (Online Diary) रहल। एह में होखे वाली एंट्री सभ के बीनी बेबीज़ नाँव से सभसे बेहतरीन प्रोडक्ट के चुनाव द्वारा अपडेट कइल जाय आ वेबसाइट के विजिट करे वाला उपभोक्ता लोग एह पर महीनावार वोटिंग करे।[6]

प्रकार भा किसिम

ब्लॉग किसिम-किसिम के, मने की कई प्रकार के, हो सके लें। आज के समय में जहाँ कई अरब ब्लॉग ऑनलाइन पब्लिश हो रहल बाड़ें, इनहना में बहुत सारा ब्लॉग अइसनो बाड़ें जिनाहन के कौनों एगो कटेगरी में ना रखल जा सके ला।[7] इनहन के किसिम चाहे परकार में बाँटे के आधार अलगा-अलगा हो सके ला आ कई गो ब्लॉग जहाँ खुद के बिबरन में आपन कटेगरी चाहे किसिम बतावे वाला हो सके लें ओहिजे अइसन ब्लॉग हो सके लें जे एकही साथे कई बिधा में आ कई कटेगरी में गिनल जा सकें।

नब्बे के दशक के अंत में, जब ब्लौगिंग के बिस्तार तेजी से होखत रहल, मुख्य रूप से दू किसिम के ब्लॉग रहलें: पर्सनल डायरी नियर लिखल जाए वाला आ दुसरे इस्टोरी सभ के बारे में लिखल जाए वाला।[7] हालाँकि, 2004 के एगो अध्ययन में तीन किसिम के ब्लॉग[7] गिनावल गइल: फिल्टर ब्लॉग - जेह में दुसरे वेबसाइट सभ के लिंक के बिसय आ पसंद के हिसाब से फिल्टर क के पढ़े वाला ले चहुँपावल जा सके, पर्सनल ब्लॉग - जे केहू ब्यक्ति के निजी अनुभव भा बिचार, संस्मरण आ रोज के कामकाज के डायरी नियर लिखल पोस्ट से बनल होखें, आ नॉलेज ब्लॉग - जे बिबिध बिसय पर जनरल तरीका से चाहे अपना-अपना बिसेस बिसय पर जानकारी देवे वाली आ ज्ञान बढ़ावे वाली पोस्ट करें।

नीचे ब्लॉग सभ के बिबिध किसिम के एगो बिबरन संछेप में दिहल जा रहल बाटे:

पर्सनल भा निजी ब्लॉग
सामूहिक (ग्रुप) ब्लॉग
माइक्रोब्लॉगिंग

बिधा अनुसार ब्लॉग

इहो देखल जाय

संदर्भ

  1. "After 10 Years of Blogs, the Future's Brighter Than Ever". Wired. 17 दिसंबर 2007. Retrieved 5 जून 2008.
  2. "It's the links, stupid". The Economist. 20 अप्रैल 2006. Retrieved 5 जून 2008.
  3. Merholz, Peter (1999). "Peterme.com". इंटरनेट आर्काइव. Archived from the original on October 13, 1999. Retrieved 5 जून 2008.
  4. Kottke, Jason (26 अगस्त 2003). "kottke.org". Retrieved 5 जून 2008.
  5. Origins of "Blog" and "Blogger" Archived 3 नवंबर 2014 at the Wayback Machine, American Dialect Society Mailing List (20 अप्रैल 2008).
  6. Bissonnette, Zac (2015). "The $12-per-hour Sociology Major Who Made Ty Warner a Billionaire". The Great Beanie Baby Bubble: Mass Delusion and the Dark Side of Cute. पेंग्विन बुक्स. pp. 107–121. ISBN 978-1591846024.
  7. 7.0 7.1 7.2 Farkas, Meredith G. (2007). Social Software in Libraries: Building Collaboration, Communication, and Community Online (अंग्रेजी में). Information Today, Inc. ISBN 978-1-57387-275-1. Retrieved 9 दिसंबर 2021.

बाहरी कड़ी