झरना

विकिपीडिया से
पहाड़ से गिरत पानी
एंजेल झरना दक्खिन अमेरिका महादीप के वेनेजुएला देस में बा। ई 979 मी (3,212 फीट) ऊंचाई वाला झरना दुनिया के सभसे ऊँच (सिंगल ड्राप) झरना हवे।

झरना (अंग्रेजी: waterfall) अइसन थलरूप होला जहाँ कौनों नदी के पानी ऊँचाई से अचानक नीचे गिरे ला।[1][2] झरना से कम ढाल वाला, बाकी तब्बो बहुत मजिगर तेज बहाव वाला थलरूप के अंग्रेजी में रैपिड के नाँव से जानल जाला। झरना के रूप कई किसिम के हो सके ला - ई एकही सिंगल धारा के रूप में हो सके ला भा कई गो धारा में छितरा के गिरे वाला (कैस्केड झरना) हो सके ला; एक्के बेर में पूरा पानी ऊपर से नीचे आवे वाला (सिंगल ड्रॉप) वाला हो सके ला चाहे कई खंड में नीचे गिरे वाला (सीढ़ीदार झरना) हो सके ला।

भूगोलीय चक्र चाहे नदी कटाव चक्र, में झरना के नदी के युवाअवस्था के थलरूप मानल जाला। इहो मानल जाला कि आमतौर पर झरना छोट-छोट जलधारा आ नद्दी सभ के बिसेस्ता हवे, हालाँकि, कुछ बहुत बिसाल नदी सभ भी झरना बनावे लीं जइसे कि नियाग्रा झरना[3]

ऊपर से नीचे के आधार तक ले के पूरा ऊँचाई के आधार पर दक्खिन अफ्रीका के तुगेला झरना आ सिंगल ड्राप ऊँचाई के आधार पर वेनेजुएला के एंजेल झरना दुनियाँ के सभसे ऊँच झरना बाड़ें। भारत के सभसे ऊँच सिंगल ड्राप झरना कुंचिकल झरना हवे। दुनियाँ के सभसे बिसाल झरना जमीन पर ना बलुक समुंदर के भीतर डेनमार्क जलजोड़ के झरना हवे।[4]

निर्माण[संपादन करीं]

झरना के निर्माण कई कारन से हो सके ला। आमतौर पर एह थलरूप में निर्माण नदी भा जलधारा के रस्ता में कौनों किसिम के बेवधान (ढाल के अचानक बदलाव) के रूप में होला जेकर कई तरह के कारन हो सके लें।

नदी के रास्ता में आवे वाली कड़ेर आ मुलायम चट्टान के अगल बगल पावल जाए से बने लें जहाँ मुलायम चट्टान जल्दी कट के बह जाले आ कड़ेरकी चट्टान बचल रह जाले जेकरा ऊपर से पानी खड़ा-खड़ा नीचे के ओर गिरे ला। एकरे अलावा अउरी कई तरह के कारन से झरना के निर्माण हो सके ला।

प्रकार[संपादन करीं]

आकृति आ ज्यामिति के आधार पर[संपादन करीं]

नेवादा झरना, घोड़ापोंछ आकृति के (हॉर्सटेल) झरना के उदाहरण।
पंच बाउल झरना, अपने नाँव के झरना सभ के उदाहरण।
जोग चाहे गरसोप्पा झरना, कम बरखा के सीजन में ई कई धारा में बहे ला।
काकोलत झरना, सीढ़ीदार प्रकार के उदाहरण।
जोन्हा झरना, कैस्केड झरना प्रकार के उदाहरण।
इवासू (iguazu) झरना, कैटरैक्ट झरना प्रकार के उदाहरण।

झरना के पानी कवना तरीका से ऊपर से नीचे उतरत बा, एह पूरा चीज के रूप आ आकृति कवना किसिम के बा, एह आधार पर झरना सभ के कई प्रकार बतावल जाला। हालाँकि, ई बहुत बैज्ञानिक बर्गीकरण ना मानल जाला। नीचे कई ठे स्रोत[5][6][7][8][9][10] से इनहन के नाँव आ बिबरन ले के प्रस्तुत कइल गइल बा:

प्लंज (plunge)

अइसन झरना जेह में पानी एकदम से सीधा नीचे के ओर गिरे आ पाछे के चट्टान रुपी देवाल से बहुत संपर्क न रहे। एह अरथ के अनुसार ई लटक झरना भी कहल जा सके ला। प्लंज (plunge) के मतलब होला गोता चाहे डुबकी लगावल; एह झरना में अइसन बुझाला कि पानी ऊपर से नीचे आवत बा आ नीचे बनल कुंड में गोता लगा रहल बाटे। निचवाँ जवन गड़हा भा कुंड बन गइल होला ओकरा के प्लंज पूल कहल जाला।

हॉर्सटेल (horsetail)

हॉर्सटेल के मतलब हवे घोड़ा के पोंछ। एह झरना सभ के आकृति अइसन होला कि दूर से देखले पर घोड़ा के पोंछ नियर बुझालें; ऊपरी हिस्सा में पातर बाकी नीचे आवे पर चौड़ाई में कुछ बिस्तार होखत जाला।

पंचबाउल (punchbowl)

पंचबाउल (punchbowl) के अंग्रेजी में अरथ होला खरल (छोट ओखर) जेह में मसाला ओसाला कूटल जाला। इनहन में पानी के गिराव अइसन होखे ला जे देखे पर बुझाला कि ओखर चाहे खरल में मूसर नियर पानी गिर रहल बाटे।

स्लाइड (slide)

स्लाइड के अरथ होला पार्क में लरिकन के खेले खातिर बनावल गइल फिसलनी जेहपर एक ओर से सीढ़ी से चढ़ के दुसरे ओर ढाल पर सरक के तेजी से नीचे आवे लें। झरना सभ के एह परकार में ढाल बहुत खड़ा ना होखे ला आ पानी लगभग हमेशा अपना पाछे के देवाल से सट के बहे ला। हालांकि, इनहन में पानी के बहाव, ऊँचाई आ पानी के मात्रा रैपिड्स से बेसी होखे ला।

शूट (chute)

स्लाइड के एगो परकार कहल जा सके ला। शूट के अरथ होला फिसलनी जे सँकेत आकृती के होखे। पानी एह संकरा चैनल नियर हिस्सा से हो के गुजरे ला आ बहुत तेजी से खतरनाक बहाव वाला हो सके ला।

रिबन (ribbon)

फीता के आकृति के झरना जेह में बहुत पातर धारा ऊपर से नीचे गिरे। अंग्रेजी में रिबन (ribbon) माने फीता होला।

फैन (fan)

पंखा नियर आकृति बनावे वाला झरना। जइसे हॉर्सटेल झरना में नीचे आवे पर पानी के चौड़ाई बढ़े ला, एह झरना सभ में ई अतना बढ़ जाला कि पूरा आकृति पंखा नियर बुझाए लागे ला।

टायर्ड (tiered)/ स्टेप (step)

इनहन के सीढ़ीदार झरना कहल जाला। पानी एकही बेर में ऊपर से नीचे ना आ जाला बलुक चट्टान सभ के स्थिति अइसन होखे ला की कई गो सीढ़ी सभ से उतरे नियर तस्वीर बने ले।

सेगमेंटेड (segmented)

पानी एगो धारा भा लगातार चौड़ाई वाला बहाव के रूप में ना होखे ला बलुक कई टुकड़ा में बाँट के बहे ला।

कैस्केड (cascade)

पानी कई धारा में बंटे ला आ फिर जुड़े ला। मने कि अइसन झरना जेह में चाकर छितराइल रास्ता में बीचा बीचा में चट्टान के उभार देखाई पड़े। इनहन के छितरा झरना कहल जा सके ला।

ब्लॉक (block)

इनहन के रैंप चाहे लेज़ झरना भी कहल जाला। पानी सीधा एगो खड़ा देवाल नियर ढाल से नीचे गिरे ला। अगर ऊँचाई बहुत न होखे, पानी के बहाव के चौड़ाई आ ऊँचाई दुनों लगभग बरोबर होखे तब इनहन के क्लासिकल ब्लॉक झरना चाहे रेक्टैंगुलर (आयताकार, चौखूंटा के आकृति के) झरना भी कहल जाला।

कैटरेक्ट (caterect)

कैटरैक्ट झरना अइसन झरना होखे लें जे बहुत बिसाल होखें आ जिनहन में बहुत भारी मात्रा में पानी के बहाव होखे। एह भारी बहाव आ बिसाल झरना सभ में ऊपर से पानी के गिरे के कारन धुआँसा नियर बन जाला; अइसन बुझाला कि झरना के बीच में बादर बन गइल बाटे आ इनहन में नीचे के इलाका में बरखा होखे नियर महसूस हो सके ला। कैटरेक्ट (caterect) शब्द के अंग्रेजी में अरथ होला मोतियाबिंद, जेह में आँख के पुतरी के बीचा में धुंधला उज्जर चीन्हा नियर बन जाला; हालाँकि, एह अरथ के एह किसिम के झरना से कौनों संबंध बा कि ना ई बतावल मुश्किल बाटे। कुछ जगह कैटरेक्ट (cateract) इस्पेलिंग से इनहन के नाँव मिले ला आ ई बतावल जाला कि अंग्रेजी में ई यूनानी भाषा से आइल हवे जहाँ मूल अरथ "नीचे की ओर बहाव" होला।

ई नाँव, कैटरेक्ट्स खास झरनो सभ के नाँव हवे जे अफिरका के महान नील नदी के ऊपरी हिस्सा से ले के निचला हिस्सा में कई जगह बने लें। इनहन के नील नदी के कैटरेक्ट्स कहले जाला। हालाँकि, कुछ बिद्वान लोग नील नदी के एह झरना सभ के झरने ना माने ला बलुक रैपिड्स के श्रेणी में रखे ला।[11] एकरे अलावा अमेरिका में टेनेसी आ इंडियाना प्रांतन में कैटरेक्ट (cateract) नाँव के झरना बाड़ें।

बर्गीकरण में समस्या[संपादन करीं]

कई किताबन में झरना सभ एह बर्गीकरण के बारे में भी चर्चा कइल गइल बा की इनहन में अंतर कइल मुश्किल हो सके ला।

अउरी दूसर आधार सभ[संपादन करीं]

आकृति चाहे ज्योमेट्री के अलावा, झरना सभ के कई गो अउरी दूसर आधार सभ पर प्रकार में बाँटल जा सके ला।

  • पानी के मात्रा के आधार पर।[12]
  • पर्यावरण मूल्य के आधार पर।[13]

सभसे ऊँच झरना सभ[संपादन करीं]

पूरा लिस्ट अंग्रेजी में देखल जाय: List of waterfalls by height झरना सभ के ऊँचाई नापे के दू गो तरीका हो सके ला: ओभरआल ऊँचाई, मने की सभसे ऊपर से ले के झरना के निचला हिस्सा तक ले के ऊँचाई; आ सिंगल ड्राप ऊँचाई, मने कि झरना सीढ़ीदार होखे तब सभसे ऊँच खंड के ऊँचाई। नीचे दुनों आधार पर बिस्व के ऊँच पाँच-पाँच गो झरना दिहल गइल बाड़ें:

ओवरआल (पूरा) ऊँचाई के आधार पर[संपादन करीं]

झरना फोटो ऊँचाई इलाका देस संदर्भ
तुगेला झरना 983 मीटर (3,225 फीट) क्वा-जुलू नटाल दक्खिन अफ्रीका [14]
एंजेल झरना 979 मीटर (3,212 फीट) बोलिवार वेनेजुएला [15]
ट्रेस हर्मानास झरना
(Tres Hermanas Falls)
914 मीटर (2,999 फीट) जूनिन पेरू [16]
ओलूपेना झरना
(Olo'upena Falls)
900 मीटर (2,953 फीट) हवाई अमेरिका [17]
युम्बिला झरना
(Yumbilla falls)
896 मीटर (2,940 फीट) अमेज़ोनास इलाका पेरू [18]

सिंगल ड्राप (सबसे ऊँचा खंड) के ऊँचाई के आधार पर[संपादन करीं]

झरना फोटो ऊँचाई इलाका देस संदर्भ
एंजेल झरना 807 मीटर (2,648 फीट) बोलिवार वेनेजुएला [19]
वाईहिलाऊ झरना
(Waihilau Falls)
792 मीटर (2,598 फीट) हवाई अमेरिका [20]
मोंगेफोसेन झरना
(Mongefossen)
773 मीटर (2,536 फीट) मूर ऑग रोम्सडाल नॉर्वे [21]
मानावेनुई झरना
(Manawainui Falls)
719 मीटर (2,359 फीट) हवाई अमेरिका [22]
क्येराग्फोसेन झरना
(Kjeragfossen)
715 मीटर (2,346 फीट) रोगालैंड नॉर्वे [23]

इहो देखल जाय[संपादन करीं]

संदर्भ[संपादन करीं]

  1. "Waterfall | geology" (अंग्रेजी में). Britannica.com. Retrieved 2018-05-11.
  2. "waterfall Meaning in the Cambridge English Dictionary" (अंग्रेजी में). Dictionary.cambridge.org. 2018-05-07. Retrieved 2018-05-11.
  3. Grove Karl Gilbert; Albert Perry Brigham (1902). An Introduction to Physical Geography (अंग्रेजी में). D. Appleton.
  4. US Department of Commerce, National Oceanic and Atmospheric Administration. "Where is Earth's Largest Waterfall?". oceanservice.noaa.gov (अमेरिकी अंग्रेजी में). Retrieved 14 जनवरी 2021.
  5. Society, National Geographic (28 मार्च 2013). "waterfall". National Geographic Society (अंग्रेजी में). Retrieved 2 जनवरी 2022.
  6. "How Many Types of Waterfalls Are There?". WorldAtlas.com. Retrieved 2018-10-04.
  7. "Waterfall types". Suomenvesiputoukset.fi. Retrieved 2018-10-04.
  8. "Eastern Waterfall Guide - Waterfall Classification". Aria-database.com. Retrieved 2018-10-04.
  9. Garner, Troy (11 जून 2010). Waterfall's and History of the Ouachitas and Mount Magazine (अंग्रेजी में). Lulu.com. p. 7. ISBN 978-0-557-50081-9. Retrieved 2 जनवरी 2022.
  10. Karle, Tina (अक्टूबर 2019). 200 Waterfall Hikes of Ohio Revised Edition (अंग्रेजी में). Lulu.com. ISBN 978-0-359-95305-9. Retrieved 2 जनवरी 2022.
  11. Hudson, Brian J. (15 फरवरी 2013). Waterfall: Nature and Culture (अंग्रेजी में). Reaktion Books. ISBN 978-1-86189-956-9. Retrieved 2 जनवरी 2022.
  12. "World Waterfall Database - Book Review of International Waterfall Classification System". www.worldwaterfalldatabase.com (अंग्रेजी में). Retrieved 2 जनवरी 2022.
  13. Fennell, David A.; Dowling, Ross Kingston (2003). Ecotourism Policy and Planning (अंग्रेजी में). CABI. pp. 160~. ISBN 978-0-85199-762-9. Retrieved 2 जनवरी 2022.
  14. "Tugela Falls | World Waterfall Database: World's Tallest Waterfalls". January 26, 2011. Archived from the original on January 26, 2011.
  15. "Angel, Salto | World Waterfall Database: Worlds Tallest Waterfalls". Archived from the original on 2010-09-05. Retrieved 2010-04-17.
  16. "Tres Hermanas, Cataratas las | World Waterfall Database: Worlds Tallest Waterfalls". Archived from the original on 2010-12-01. Retrieved 2010-04-17.
  17. "Olo'upena Falls | World Waterfall Database: Worlds Tallest Waterfalls". Archived from the original on 2010-01-05. Retrieved 2010-04-17.
  18. "Yumbilla, Catarata | World Waterfall Database: Worlds Tallest Waterfalls". Archived from the original on 2010-01-05. Retrieved 2010-04-17.
  19. "Kerepakupai Merú, Venezuela - World Waterfall Database". www.worldwaterfalldatabase.com (अंग्रेजी में). Retrieved 2020-11-05.
  20. "Waihilau Falls, Hawaii, United States - World Waterfall Database". www.worldwaterfalldatabase.com (अंग्रेजी में). Retrieved 2020-11-05.
  21. "Mongefossen, Møre og Romsdal, Norway - World Waterfall Database". www.worldwaterfalldatabase.com (अंग्रेजी में). Retrieved 2020-11-05.
  22. "Mana'wai'nui Falls, Hawaii, United States - World Waterfall Database". www.worldwaterfalldatabase.com (अंग्रेजी में). Retrieved 2020-11-05.
  23. "Kjeragfossen, Rogaland, Norway - World Waterfall Database". www.worldwaterfalldatabase.com (अंग्रेजी में). Retrieved 2020-11-05.