अनार

विकिपीडिया से
Jump to navigation Jump to search
अनार के फल

अनार (Punica granatum) एक ठो फलदार फेड़ होला। एकर झांग नियर फेड़ बनस्पति बिज्ञान के बर्गीकरण में Lythraceae परिवार में रखल जाला आ ई फेड़ मौसम अनुसार पतई गिरा देला। एकर औसत ऊँचाई 5 आ 8 मी (16 आ 26 फीट) होले।

फेड़ में, उत्तरी गोलार्ध में सितंबर से फरवरी के बीच में[1] आ दक्खिनी गोलार्ध में मार्च से मई के बीच के सीजन में फल लागे ला। फल के अन्दर छोट-छोट चमकीला दाना होलें जे गुलाबी से ले के गहिरा लाल रंग के हो सके लें। हर दाना के बीच में एक ठो उज्जर बीया होला आ एकरा चारों ओर रस भरल रहे ला। अनार के फल के सीधे भी खाइल जाला आ जूस भी निकार के पियल जाला। एकरे अलावा एकर दाना आ जूस दुन्नों तरह-तरह के भोजन में, भोजन के सजावे में, आ पियल जाए वाला चीज जइसे स्मूदी या काकटेल इत्यादि में भी डालल जालें।

अनार के मूल स्थान वर्तमान समय के ईरान हवे जहाँ से प्राचीन काल में ई अन्य जगह पहुँचल आ ओही ज़माना से एकरा के भूमध्यसागरीय इलाकाउत्तरी भारत में उपराजल जाला।[2] स्पेन के कब्जा वाला अमेरिका में ई 16वीं सदी में चहुँपल आ कैलीफोर्निया में 1769 में नया बसे वाला लोग द्वारा ले जाइल गइल।[2]

आज के समय में आनार के खेती पूरा मध्य पूरब आ काकेशस क्षेत्र में, उत्तरी अफिरका आ उष्णकटिबंधीय अफिरका में, भारतीय उपमहादीप में, मध्य एशिया में, दक्खिन पुरुब एशिया के सूखल रहे वाला कुछ इलाका में, आ भूमध्यसागरीय बेसिन के कुछ इलाका सभ में उपजावल जा रहल बाटे।[2] उत्तरी अमेरिका के एरिजोना आ कैलीफोर्निया के कुछ हिस्सा में भी एकर खेती कइल जा रहल बा।[3] हाल के समय में यूरोपीय आ पच्छिमी गोलार्ध में एकर व्यापारिक महत्व बढ़ल बाटे।[2][3]

संदर्भ[संपादन]

  1. "Pomegranate"; Department of Plant Sciences, University of California at Davis, College of Agricultural & Environmental Sciences, Davis, CA; 2014; पहुँचतिथी 29 January 2017. 
  2. 2.0 2.1 2.2 2.3 Morton JF (1987); "Pomegranate, Punica granatum L."; Fruits of Warm Climates; Purdue New Crops Profile; pp. 352–5; पहुँचतिथी 2012-06-14. 
  3. 3.0 3.1 "Pomegranate. California Rare Fruit Growers"; Crfg.org; पहुँचतिथी 2012-06-14.