भारतीय राष्ट्रपति चुनाव, 2017

भारतीय राष्ट्रपति चुनाव सोमार, 17 जुलाई 2017 के भइल, वोट के गिनती आ रिजल्ट के घोषणा 20 जुलाई के भइल। एह चुनाव में राम नाथ कोविंद चुनल गइलें। राष्ट्रपति प्रणब मुखर्जी के कार्यकाल 24 जुलाई के ख़तम हो रहल बा आ कोविंद के कार्यकाल 25 जुलाई 2017 से सुरू होखी।

केंद्र में सत्ताधारी दल, एनडीए के सपोर्ट वाला उमेदवार के रूप में, बिहार के राज्यपाल रामनाथ कोविंद एह चुनाव में बिजई भइलेन जबकि एह चुनाव में उनके सोझा यूपीए आ अन्य बिपक्षी दल सभ के समर्थन वाली मीरा कुमार प्रतिद्वंदी रहली।

चुनाव[संपादन करीं]

भारत में राष्ट्रपति के चुनाव खातिर एक ठो चुनाव मंडल (इलेक्टोरल कॉलेज) वोट करे ला, एह में संसद के सगरी चुनल गइल प्रतिनिधि लोग आ राज्य सभ के बिधान सभा के सभ चुनल गइल बिधायक लोग सामिल होला।^[1] 2017 तक ले, एह मंडल में 776 एमपी आ 4120 एमएलए लोग बा। वर्तमान कुल वोट 10,98,882 बाने आ आधा के निशान 5,49,442 वोट पर बार। हाल के भइल राज्य बिधान सभा के चुनाव सभ के बाद एनडीए लगभग 20,000 से पाछे बाटे।^[2]

राष्ट्रपति के चुनाव के तरीका भारतीय संबिधान के अनुच्छेद 55^[3]^[4] में बतावल गइल बा।