लिम्नोलॉजी (अंग्रेजी: Limnology, लिम्नॉलजी) पृथिवी के जमीनी हिस्सा वाला इलाका सभ में मौजूद पानी वाला इकोसिस्टम सभ के अध्ययन करे वाला बिज्ञान हवे। एह बिज्ञान में थलीय हिस्सा पर पावल जाये वाली झील, झरना, नदी, ताल, तलाब, रिजर्वायर, आ संबंधित नमभूमि आ जमीनभीतरी पानी (ग्राउंडवाटर) के जीवीय, रासायनिक, भौतिक आ भूबिज्ञानिक पहलू सभ के अध्ययन होखे ला। एह बिज्ञान के एगो नया शाखा लैंडस्केप लिम्नोलॉजी बाटे जे अध्ययन के साथे-साथ अइसन इकोसिस्टम सभ के मैनेज करे आ उनहन के संरक्षित (कंजर्व) करे के काम करे ला आ एह में लैंडस्केप एप्रोच के इस्तेमाल करे ला आ कौनों थलीय पनिहा इकोसिस्टम आ ओकरे थाला (ड्रेनेज बेसिन) के आपसी कनेक्शन सभ के धियान में रख के काम करे ला।
