मैग्मा

विकिपीडिया से
गरम बहत लावा के अगिला हिस्सा जे गरमी के कारण लाल देखलाई दे रहल बा
बहत आ जमत लावा। लावा मैग्मा के बाहर निकल के बहे वाला रूप हवे।

मैग्मा चट्टानी पदार्थ सभ के पघिलल रूप हवे। मैग्मा के ठंढा हो के जमे से आग्नेय चट्टान सभ के निर्माण होला। मैग्मा धरती के भीतर गहिराई पर पावल जाला आ कुछ अन्य ग्रह आ उपग्रह सभ पर भी मैग्माई घटना के उपस्थिति के पता चलल बाटे। मैग्मा में पघिलल चट्टान के अलावा लटकल रवा आ गैस के बुलबुलो पावल जा सके लें। मैग्मा के उत्पत्ती मैंटल भा क्रस्ट के बिबिध जगह पर टेक्टानिक दशा के चलते होला जहाँ ई मैग्मा चेंबर में एकट्ठा होला। अइसन टेक्टानिक दशा आमतौर पर धँसाव (सब्डक्शन) जोन, महादीपी रिफ्ट जोन, बीच-समुंद्री रिज आ हॉट-स्पॉट सभ के लगे मिले ला। ई गरम मैग्मा ऊपर के ओर क्रस्ट भीतर उठे ला आ उहाँ मैग्मा चेंबर के भीतर एकट्ठा होखे ला अइसन बिचारल गइल बा। एह चेंबर सभ में निवास के दौरान मैग्मा में कई किसिम के बदलाव भी होला जइसे कि एह में रवा भा दाना पड़े के घटना होखे ला, अगल-बगल के क्रस्ट के पघिलल पदार्थ के मिल जाए से एकरे पदार्थ के कंपोजीशन में बदलाव होला, मिक्सिंग होला आ एह में से गैस के रिलीज हो के बाहरे निकल जाए के प्रक्रिया होला। ऊपर आवे के क्रम में ई मैग्मा कौनों ज्वालामुखी के द्वारा बाहर निकल सके ला (एकरा के लावा कहल जाला), या फिर अंदरूनी चट्टानी जमाव के रूप ले सके ला।