जॉन मिल्टन

जॉन मिल्टन
जॉन मिल्टन
	पोर्ट्रेट, लगभग 1629 के समय के।
मूल नाँव	John Milton
जनम	9 दिसंबर 1608; ब्रेड स्ट्रीट, चीपसाइड, लंदन, इंग्लैंड
निधन	8 नवंबर 1674 (उमिर 65); बनहिल, लंदन, इंग्लैंड
समाधी	सेंट गिल्स-विदाउट-क्रिपलगेट
पेशा	कवी, निबंधकार, सिविल सेवक
भाषा	अंग्रेजी
राष्ट्रियता	अंगरेज
महतारी संस्था	क्राइस्ट कॉलेज, कैंब्रिज
प्रमुख रचना	पैराडाइज लॉस्ट
दसखत

जॉन मिल्टन (John Milton, 9 दिसंबर 1608 – 8 नवंबर 1674) एगो अंगरेज कवि, बिद्वान आ सिविल सर्वेंट रहलें। सिविल सेवा में ई ओलिवर क्रूमवेल के जमाना के कॉमनवेल्थ ऑफ इंग्लैंड खाती आपन सेवा दिहलें। धार्मिक आ राजनीतिक उठान के जुग में आपन रचना कइलें आ इनके परसिद्धी इनके लमहर कबिता पैराडाइज लॉस्ट (1667) जे ब्लैंक वर्स में लिखल एगो महाकाब्य नियर कबिता हवे।

मिल्टन के कबिता आ निबंध में गहिराई ले निजी निश्चय के भाव झलके ला, आजादी आ खुद के निश्चय, अउरी ओह जमाना के राजनीतिक उथलपुथल के झलक भी मिले ला। मिल्टन अंग्रेजी के अलावा, लैटिन, ग्रीक, आ इटैलियन भाषा में लिखलें आ अपना जिनगिये में उनके अंतर्राष्ट्रीय स्तर पर परसिद्धी मिलल आ उनके रचना एरोपैगाइटिका (1644), जे छपे से पहिलहीं रोक (सेंसर) के बिरोध में लिखल गइल रहे, बहुत परसिद्ध भइल आ इतिहास के कुछ बहुत परभावकारी रचना सभ में गिनल जाले, बोले के आजादी आ प्रेस के आजादी के पक्ष में प्रबल रूप से आवाज उठावे वाली रचना मानल जाले।