हैबिटाट बिनास

हैबिटाट बिनास (अंग्रेजी: habitat destruction) चाहे हैबिटाट क्षय (reduction) चाहे हैबिटाट के नोकसान (loss) इकोलॉजी आ पर्यावरणी बिज्ञान के कांसेप्ट हवे; अइसन दसा जेह में कौनों हैबिटाट में अइसन बदलाव होखे कि ऊ अपना मूल निवासी जीव प्रजाति के रहे लायक ना रहि जाय, ओह प्राजाति के सपोर्ट करे में बिफल होखे लागे। हैबिटाट कौनों जीवधारी सभ के समुदाय के मूल निवास अस्थान होखे ला, अइसन पर्यावरणी दसा सभ जेह में ऊ जीव-प्रजाति अपना से सभसे बेहतर रहे लायक पावत होखे। जब एह दसा सभ में बदलाव होखे ला आ पर्यावरण के ऊ हिस्सा जीवधारी के रहे लायक ना रहि जाला चाहे ओह में रहे में जीवधारी सभ पर दबाव पड़े लागेला अइसन इस्थिति के हैबिटाट बिनास चाहे हैबिटाट क्षय के रूप में परिभाषित कइल जाला।

हैबिटाट क्षय के परिणाम ई होला कि ओह में रहे वाली जीव प्रजाति सभ या त उहाँ से दूर जाए लागे लीं, उनहन के संख्या में कमी आवे लागे ला, चाहे उनहनो के बिनास सुरू हो जाला। एकरा चलते ओह इलाका में बायोडाइवर्सिटी के क्षय होखे ला आ प्रजाति सभ इलाका से बिलुप्त होखे लागे लीं। वर्तमान समय में बायोडाइवर्सिटी के क्षय के सभसे प्रमुख कारण हैबिटाट बिनास बाटे।

हैबिटाट बिनास के सभसे आसान उदाहरण बा कौनों जंगल भा बन के मनुष्य द्वारा खेती चाहे कौनों दूसर रूप से इस्तेमाल वाला जगह में बदल दिहल। एकरा चलते मूल प्राकृतिक दसा बदल जाला आ ऊ इलाका अब ओह जीवधारी सभ के रहे लायक ना रह जाला जे प्राकृतिक रूप से ओहिजे निवास करत रहलीं।

इहो देखल जाय

• हैबिटाट
• पर्यावरणी गिरावट