ल्यूकोरिया

ल्यूकोरिया भा सफेद पानी आवल, एक तरह के रोग हवे जेह में लइकी भा औरतन के जञनी में से सफेद या हल्का पियराहूँ पानी आवे लागे ला।^[1]^[2] एह तरह के पानी के साथे-साथ खजुलाहट आ बदबू के समस्या भी होखे सुरू हो जाला। ल्यूकोरिया के आम कारण शारीरिक बदलाव, जेकरे कारण एस्ट्रोजेन के ढेर निकास होखे लागे ला; या फिर जञनी में इन्फेक्शन भा सेक्सुअल बेमारी होखल हो सके ला।

ल्यूकोरिया के टेस्ट कइल जाला जेह मे आवे वाला पानी में सफेद खून कण के मात्रा के जाँच कइल जाला। अगर जञनी से बाहर निकले वाला पानी में 10 से ढेर सफेद खून कण (>10 WBC) पावल जाय तब मानल जाला कि ल्यूकोरिया हो गइल बा।

ल्यूकोरिया के इलाज जल्दी से करावे के जरूरत होला आ आमतौर पर ई जल्दी इलाज से ठीक भी हो जाला। कभी-कभार, शारीरिक बदलाव से होखे वाला ल्यूकोरिया अपने आप भी ठीक हो जाला। ज्यादे समय तक बेमारी जारी रहे तब पानी मे पियरापन आ बदबू बढ़त जाला, एकरे निकले के समय खजुलाहट आ काटे वाला अनुभव बढ़त जाला। कौनों इन्फेक्शन भा सेक्सुअल बेमारी के चलते होखे वाला ल्यूकोरिया के इलाज जल्दी से करावल जरूरी होला।

नाँव

ल्यूकोरिया (Leukorrhea) अंग्रेजी भाषा के शब्द हवे; अंग्रेजी में ई यूनानी भाषा के दू गो शब्द λευκός (leukós, “सफेद”) + ῥοία (rhoía, “बहाव, प्रवाह”) से मिला के बनावल गइल हवे। हिंदी में एकरा के श्वेत प्रदर या फिर खाली प्रदर कहल जाला। भोजपुरी में आम भाषा में ल्यूकोरिया, लिकोरिया, लुकोरिया या सफेद पानी के नाँव से जानल जाला। लातीनी भाषा (लैटिन) में एकरा के फ्लोर एल्बस (fluor albus) कहल जाला।