पॉ पेट्रोल

विकिपीडिया से

पॉ पेट्रोल (अंगरेजी: PAW Patrol) लड़िकन खातिर एगो कनाडाई टीवी एनीमेशन सीरीज बा जे कीथ चैपमैन द्वारा बनावल गइल बा। एकर प्रोडक्शन स्पिन मास्टर एंटरटेनमेंट करे ला अ एनीमेशन के काम गुरु स्टूडियो द्वारा कइल गइल हवे। कनाडा में एकर प्रसारण 2013 में शुरू भइल जबकि अमेरिका में ई 12 अगस्त 2013 से निकोलेडियन पर देखावल जाए शुरू भइल। भारत में ई वर्तमान में निकोलेडियन चैनल पर देखावल जा रहल बाटे। ई सीरीज 160 से बेसी देसन के टीवी नेटवर्क सभ पर देखावल जाए खातिर बेचल गइल बा।[1]

एह सीरीज में राइडर नाँव के एगो लड़िका लीडर के रोल में बा आ ओकरे टीम में मुख्य रूप से छह गो पिल्ला (पप) बाड़ें जे खोज आ बचाव काम करे में अलग-अलग किसिम के बिसेस्ता वाला पिल्ला हवें। कहानी के जगह एगो काल्पनिक शहर एडवेंचर बेय हवे जे समुंद्र किनारे के छोट शहर हवे। एहिजा के मेयर एगो महिला हई जे मेयर गुडवे नाँव से जानल जाली। पिल्ला सभ अपना-अपना अइसन कुकुरघर (डॉगहाउस) में रहे लें जे जरूरत के समय बिसेस किसिम के गाड़ी में बदल जालें।

मुख्य छह गो पप सभ में चेज़, पुलिस वाला पिल्ला; मार्शल, दमकल वाला पप; रॉकी, रिसाइकिल वाला पप; जूमा, पानी में बचाव करे वाला पप, रबल, कंस्ट्रक्शन के काम करे वाला पप आ स्काई नाँव के पिल्ली, एवियेटर (हवाई उड़ान वाली) पप हवें। इनहन के अलावा कभी कभार एवरेस्ट, बर्फीला जगह पर बचाव करे वाली, आ ट्रैकर नाँव के पप जंगल में खोज आ बचाव करे वाला पप देखलाई पड़े लें।

कहानी में औरी पात्र सभ में मेयर हमडिंगर आ उनके किटेन (बिलाई के बच्चा सभ) विलेन के रोल में रहे लें।

संदर्भ[संपादन करीं]

  1. "Spin Master Announces Acquisition of Swimways Corporation and Establishment of Outdoor Business Segment". PR Newswire (Press release). August 2, 2016. Archived from the original on August 23, 2016. Retrieved August 17, 2016.