कोरिलेशन
सांख्यिकी में, कोरिलेशन (अंग्रेजी: correlation) अइसन माप हवे जे बतावे ला की दू गो वैरियेबल आपस में केतना जुड़ल बाने। एक वैरियेबल के आजाद वैरियेबल के रूप में लिहल जाला आ दुसरहा के डिपेंडेंट (निर्भर) वैरियेबल के रूप में, दुनों के बीच लीनियर निर्भरता के नाप कइल जाला आ ई बतावल जाला की डिपेंडेंट वैरियेबल फ्री वैरियेबल प केतना मात्रा में निर्भर बाटे।
कोरिलेशन के कई किसिम के माप करे के तरीका आ फार्मूला बाड़ें, जे अलग-अलग दशा आ जरूरत अनुसार इस्तेमाल कइल जा सके लें। स्पीयरमैन के रैंक ऑर्डर कोरिलेशन आ कार्ल पियर्सन के प्रॉडक्ट मूमेंट कोरिलेशन कोफिशियेंट सभसे चलनसार दू गो तरीका हवें। आमतौर प कोरिलेशन के माप, जेकरा के गिनती में बतावल जाला आ जे कोरिलेशन कोफिशियेंट कहाला, माइनस एक (-1) से प्लस एक (+1) के बीचा में होला - माइनस एक के मतलब होला भरपूर निगेटिव कोरिलेशन, प्लस एक के मतलब होला भरपूर पॉजिटिव कोरिलेशन आ जीरो (0) क मतलब होला कौन हूँ कोरिलेशन क अभाव।
कोरिलेशन के साथे कुछ गलतफहमी जुड़ल बाड़ीं - जइसे की आमतौर प इहो मान लिहल जाला की कौनों दू गो वैरियेबल में कोरिलेशन बाटे त ऊ आपस में कार्य-कारन संबंध के चलटे जुड़ल बाने, जबकि कोरिलेशन अइसन कवनों बात के माप ना हवे। कोरिलेशन कारनता (कॉजेशन) से अलग होला।
कोरिलेशन प डेटा के डिस्ट्रीब्यूशन क बहुत परभाव पड़े ला, ई वास्तव में तबे सार्थक माप साबित होला जब डेटा अपना औसत (स्टैटिस्टिकल मीन) के इर्द-गिर्द डिस्ट्रीब्यूट होखे, चाहे नॉर्मल डिस्ट्रीब्यूशन होखे।