शिक्षाशास्त्र

एकरा के शिक्षा बिज्ञान या एजुकेशन से अलगा बूझल जाय।

शिक्षाशास्त्र (Pedagogy, /ˈpɛdəɡɒdʒi, -ɡoʊdʒi, -ɡɒɡi/; पेड'गोजी) पढ़ावे (टीचिंग) के कला, बिज्ञान आ पेशा हवे। ई ज्ञान-बिज्ञान के शाखा आ अध्ययन के बिसय हवे जेह में पढ़ाई, पढ़ावे के तरीका, सीखल आ सीखे के तरीका; आ इनहन पर बिबिध सामाजिक, मनोबैज्ञानिक तत्वन के परभाव वगैरह के अध्ययन कइल जाला। एक दूसर नाँव एजुकेशन चाहे एडुकेशन (education) हवे; हालाँकि शिक्षा बिज्ञान भा एजुकेशन साइंस के आधुनिक समय में पेडागोजी से ब्यापक बिसय मानल जाला।

पेडागोजी के आम परिभाषा दिहल जाला — पढ़ावे के बिधी के अध्ययन, जेह में शिक्षा के मकसद आ एह मकसद सभ के हासिल करे के तरीकवो सामिल होखें। पेडागॉजी के अक्सरहा पढ़ावे-लिखावे के कला आ प्रक्रिया (आर्ट आ प्रॉसेस) के रूप में वर्णित कइल जाला। शिक्षक जवन शिक्षण पद्धति अपनावेलन, ऊ उनका के पढ़ावे के तरीका, निर्णय आ शिक्षण रणनीति के आकार देले। एह प्रक्रिया में सीखला के सिद्धांत, विद्यार्थी के जरूरत, समझ, पृष्ठभूमि आ व्यक्तिगत रुचि जइसन बातन के ध्यान में रखल जाला।शिक्षाशास्त्र के मकसद ब्यापक हो सकेला। ई एक ओर उदार शिक्षा (लिबरल एजुकेशन) के माध्यम से मनुष्य के समग्र विकास पर जोर दे सकेला, त दुसरे ओर व्यावसायिक शिक्षा (वोकेशनल एजुकेशन) के तहत खास कौशल सिखावे आ सीखे पर केंद्रित हो सकेला।

शिक्षण रणनीति विद्यार्थी के पहिले से मौजूद ज्ञान, अनुभव, परिस्थिति, वातावरण आ शिक्षक-विद्यार्थी द्वारा निर्धारित सीखला के लक्ष्य के आधार पर तय कइल जाला। एह तरह के शिक्षण पद्धति के एगो प्रसिद्ध उदाहरण सुकराती पद्धति (सॉक्रेटिक मेथड) हवे, जवना में सवाल-जवाब के माध्यम से ज्ञान आ समझ विकसित कइल जाला।

शिक्षण के बिधि

These paragraphs are an excerpt from शिक्षण बिधि.[संपादन करीं]

शिक्षण विधि भा पढ़ावे के तरीका (अंग्रेजी: Teaching Method) सिद्धांत आ तरीका सभ के एगो समूह हवे, जवना के इस्तेमाल टीचर विद्यार्थी के सीखला में मदद करे खातिर करेलन। ई रणनीति सभ कुछ हद तक पढ़ावल जाए वाला विषय, कुछ हद तक विद्यार्थी के ज्ञान आ दक्षता, आ कुछ हद तक सीखला के वातावरण से पैदा होखे वाली सीमाजन के आधार पर तय होले। कवनो शिक्षण विधि तबे उपयुक्त आ प्रभावी मानल जाले जब ऊ विद्यार्थी, विषयवस्तु के प्रकृति आ अपेक्षित सीखला के परिणाम के ध्यान में रखे।