शब्दइतिहास

विकिपीडिया से

शब्दइतिहास भा व्युत्पत्तिशास्त्र (अंग्रेजी: Etymology) अइसन बिद्या हवे जे शब्दन के इतिहास के अध्ययन करे ले। कौनों शब्द बिसेस के शब्दइतिहास के मतलब भइल ओह शब्द के उत्पत्ती, उच्चारण बदलाव, बिकास, अर्थबदलाव वगैरह के ब्याख्या। भारतीय परंपरा में हजारन साल पहिले पैदा भी अध्ययन के शाका निरुक्त में एकर अध्ययन शुरू भइल रहे आ इहे भारतीय भाषा बिज्ञान के मूल हवे।

अंग्रेजी में एकरा के एटिमॉलजी कहल जाला आ एह बिद्या के अलावा कौनों शब्द के इतिहास के बिबेचनो के एटिमॉलजी कहल जाला। जगह के नाँव सभ के इतिहास (उत्पत्ती आ विकास) के अध्ययन करे वाली बिद्या के अंग्रेजी में टोपॉनमी कहल जाला।

जवना भाषा सभ के लिखाई के लमहर इतिहास रहल बा, बिद्वान लोग पुराना लिखे के तरीका आ हिज्जे इतिहास के अध्ययन करे ला। एह में ओह भाषा के बारे में मौजूद पाठ के भी अध्ययन कइल जाला। एह लिखित चीज सभ के अध्ययन से ई पता लगावे ला कि पहिले एह शब्द के का इस्तेमाल होखत रहे, कइसे एकरे अरथ आ रूप में बदलाव भइल, कब ई एह भाषा में आइल। दुसरे भाषा से आइल शब्द सभ के अध्ययन में तुलनात्मक बिधि के इस्तेमाल भी कइल जाला। तुलनात्मक बिधि भाषा बिज्ञान के अइसन टेकनीक हवे जेह में एकही रूट से आइल शब्द सभ जे अलग अलग भाषा में पावल जालें उनहन के बिकास के अध्ययन एक साथे तुलना कइ के कइल जाला। उदाहरण खाती जादेतर यूरोपीय भाषा सभ के बहुत सारा शब्दन के मूल इंडो-यूरोपियन भाषा सभ के भाषाई परिवार में काफी पाछे तक खोजल जा सके ला। आज्काल्ह के भारतीय आर्य भाषा सभ में भी संस्कृत के धातु वगैरह तक शब्द के मूल खोजल जा सके ला आ एकरो पाछे ले जा के संस्कृत फ़ारसी वगैरह के तुलना क के प्रोटो-इंडो आर्य भाषा तक ले के शब्दन के अनुमान लगावल जा सके ला।