नमकीन
नमकीन भारतीय उपमहाद्वीप में कई किसिम के पकवान सभ खातिर एगो आम चलन के नाँव हवे जिनहन में नमक-मसाला पड़ल होला आ भूज के चाहे छान के बनावल जालें।[1]आमतौर पर नमकीन में फ्राई कइल चना के दाल, मोम्फली, मसुरी, मटर आ चिउरा; छान के बनावल सेव, भुजिया, छोट-छोट आलू के चिप्स इत्यादि चीज एक साथे मिक्स कइल जालीं; भूँजल चाहे फ्राई कइल काजू, बदाम, आ अउरी कई किसिम के सूखा मेवा आ बीया सभ के भी मिलावल जा सके ला।
मिक्स नमकीन के अलावा एकर बहुत सारा आइटम अलगा से अपने आप में नमकीन कहल जा सके लें आ नमकीन के रूप में खाइल जा सके लें। ई आम भारतीय स्नैक्स हवें जे चाय-काफ़ी चाहे शर्बत के साथे कब्बो खाइल जा सके लें। बिहार में मैदा के बनल निमकी के अपने आप में नमकीन कह दिहल जाला। बियाह चाहे अउरी अइसन समारोह सभ में आमतौर पर मिक्स नमकीन परोसल जाला। सेव आ निमकी नियर नमकीन सभ के छोला-समोसा, खाली चना चाहे मटर के छोला, पोहा नियर पकवान सभ के ऊपर से डाल के खाइल जा सके ला।
आमतौर पर हल्दीराम, बिकानो, पारले आ अउरी अइसन कई कंपनी बाड़ी जे वीविध किसिम क नमकीन बनावे लीं। हल्दीराम क भुजिया, नवरतन आ खट्टा-मीठा कुछ टिपिकल भारतीय नमकीन बाड़ें।
गैलरी
[संपादन करीं]-
बंबईया मिक्स, एक किसिम क मिक्स नमकीन -
सेव, एक किसिम क नमकीन ह -
मसाला पूरी के ऊपर डालल सेव -
बंगाली नमकीन, झालमुड़ी
संदर्भ
[संपादन करीं]- ↑ O'Brien 2003, p. 12.
किताब
[संपादन करीं]- O'Brien, C. (2003). Flavours Of Delhi: A Food Lover's Guide. Penguin Books Limited. ISBN 978-93-5118-237-5. Retrieved 29 Dec 2024.