क्रेयोन शिनचैन

विकिपीडिया से
Jump to navigation Jump to search

क्रेयोन शिनचैन (जापानी: クレヨンしんちゃん, Hepburn: Kureyon Shin-chan), जेकरा शिनचैन नांव से जानल जाला, योशितो उसुई के लिखल एगो जापानी मांगा हऽ। एमे शिन्नोसुके "शिनचैन" नोहारा नांव के एगो पाँच बरिस के लइका, ओकर पिता,माई, बहिन आ ओकर संघतिया के कहानी हटे। एके जापान के कासुकाबे नगर के देखावल गइल बा।

शिनचैन पहिलका बेरा 1990 मे मांगा एक्शन नांव के एगो साप्ताहिक मैगज़ीन मे छपल रहे। योशितो उसुई के मुअला के चलते असल मांगा के 11 सितंबर 2009 के बन करे के पड़ल। नयका मांगा 2010 मे न्यू क्रेयोन शिनचैन नांव से चालू भइल ((新クレヨンしんちゃん, Shin Kureyon Shin-chan)। एकर एनिमे बनल 1992 मे चालू भइल जे आज ले चलऽता आ तीस से बेसी भासा मे आ चुकल बा। ई 45 देसन मे देखावल जा चुकल बा, आज ले 1007 गो एपिसोड आ 26 गो फिलिम बनल बा। अभी ले 27.5 करोड़ गो मांगा बेचाइल बा।

परिचय[संपादन करीं]

जापान के एगो रेलगाड़ी जेपे क्रेयोन शिनचैन बनल बा

एकर असल मे ढेर सभ मजाक चाहे चुटकुला अईसन बा जेमे सही भासा के परजोग नइखे कइल गइल। एहिसे अईसन लोग जे जापानी ना जाने उ लोग एकर मजाक के बुझ ना पावेला। कोनो कोनो के तऽ दोसर भासा मे अनुवादो ना कईल जा सके। कुछो निश्चित वाक्य चाहे कहाउत लगभग हरमेशा कुछो काम के संगे होला; एमे से कए गो वाक्य सभ के निश्चित जबाब होला। एकरे चलते अईसन देखे के मिलेला जे शिनचैन कए बेरा आपन माई बाबू के लगे ओह घड़ी के हिसाब से गलती वाक्य के परजोग करेला; जइसे की; जब शिनचैन घरे आवेला तऽ "Welcome Back" (भोजपुरी: स्वागत बा; जापानी: おかえりなさい; "okaeri nasai") बोलेला; बलुक ओकरा "I am home" (भोजपुरी: हम घरे आ गइनी; जापानी: "ただいま" "Tadaima") बोले के चाहीं। अनुबाद करे मे एगो अउरी परेसानी ओनोमेटोपोइक (अईसन शब्द जेकर उच्चारन ओकर माने बतावेला; जइसे घड़ी के आवाज खाती टिक टिक शब्द) जापानी शब्दन के उपजोग से जनमेला।

कुछू अउर हसे वाला बात जे श्रृंखला मे दोहरावल जाला, ऊ सभ अधिक सार्वभौमिक (सभ जगहा एके लेखा) गुन के होला, जइसे अईसन काम सभ जेकरा से लोग हसे (जैसे चॉपस्टिक से बरफ खाइल) चाहे, लइका होला के बादो, सेयान लेखा बोलल। बाकिर तबो, बहुते सभ चिझ के बुझ के सराहे ला जापानी संस्कृति आ/चाहे भासा के समझ होखे के चाहीं; जइसे की, शिनचैन के "मिस्टर एलीफैंट", भले इ बुझा जाला बाकिर, एकर संबंध एगो लइकन सभ के जापानी गीत "ज़ो-सान" (ぞ さ さ ん) से बा। शिनचैन हमेसा अपना से बड़ सुन्नर लइकी सभ के देख के पगला जाला, आ एकरा मे बेसी हसि तब आवेला जब शिनचैन छोट लइका लेखा ई लोग के लोभावे के कोसिस करेला, जइसे कि ऊ लोग से पूछ के (खराब ढंग से) "का तोहरा शिमला मिर्च पसन बा?" (ー き マ ー 好 ー?)। शिनचैन अपना से बड़ लोग से नीमन से ना बतियावे, जइसे की, खिसियाह लोग से पूछ के की "पुलिस लगे तू कतना बेरा गइल बाड़ऽ?" चाहे बुढ़ लोग से पूछ के की "तू कय बरिस के बाड़ऽ?"।