कोल्ड ड्रिंक

विकिपीडिया से
Jump to navigation Jump to search
शीसा के गिलास में करिया रंग के लिक्विड में तैरत बरफ के टुकड़ा
गिलास में भरल कोला आ बरफ।

कोल्ड ड्रिंक (अंगरेजी: Cold drink) या ठंढा एक तरह के पेय हवे, जवन आमतौर प कार्बोनेटेड पानी, मिट्ठा आ प्राकृतिक भा आर्टिफिशियल फ्लेवर मिला के बनावल गइल होला आ ठंढा क के पियल जाला। कुछ ठंढा सभ बिना कार्बोनेटेड पानी के भी बने लें, जइसे नींबू-पानी, लेमनेड, ऑरेंज सोडा इत्यादि; मीठ करे वाला पदार्थ भी हमेशा चीनिए ना होला बलुक फल से निकले वाला मीठा (फ्रक्टोज) या फल के प्राकृतिक जूस, चीनी के बिकल्प (डायट सबस्टिच्यूट) इत्यादि, या इनहन के मिलजुल रूप में इस्तेमाल से बनल हो सके ला। एह पेय सभ में कैफीनो कुछ मात्रा में हो सके ला, रंग आ महक खाती आ संरक्षित रखे खाती कृत्रिम रसायन के इस्तेमाल भी हो सके ला।

अंगरेजी में इनहन के सॉफ्ट ड्रिंक भी कहल जाला जे शराब भा अन्य एल्कोहल वाला पेय के तुलना में इनहन के हलका होखे के कारण पड़ल नाँव हवे। इनहन में कुछ मात्रा में एल्कोहल भी मौजूद हो सके ला हालाँकि, कौनों पेय के गैर-एल्कोहलिक कहल जाए खातिर ओह में 0.5% से कम एल्कोहल होखे के चाहीं।[1][2] एह पैमाना के आधार पर फल के जूस आ चाय नियर पेय भी सॉफ्ट ड्रिंक के श्रेणी में आ जालें, हालाँकि ई नाँव परंपरा में इनहन खातिर ना इस्तमाल होला।

आमतौर पर इनहन के खूबे ठंढा (चिल्ड) क के परोसल जाला, बाकि कुछ अइसन ड्रिंक सभ के आम तापमान प भी आ कुछ के त बाकायदा गरम क के भी परोसल आ पियल जाला।[3] कोल्ड ड्रिंक कई रूप में बजार में मौजूद बाड़ी सऽ जेह में कैन में, शीशा के बोतल में या गिलासनुमा बोतल में भरल रूप प्रचलित बाने। प्लास्टिक के बोतल छोटहन साइज से ले के दू-अढ़ाई लिटर तक ले के मात्रा ले के मौजूद बाड़ीं। कोल्ड ड्रिंक सभ के चलन आमतौर पर फास्ट फूड के साथ, या जश्न के माहौल में हल्का ड्रिंक के रूप में, परिवार में नाश्ता इत्यादि के साथ आ सिनेमा में आ रेस्टोरेंट में बहुत बा। इनहन के पाइप (स्ट्रा) से, गिलास में ढार के, या फिर कैन या बोतल से सीधे भी पियल जाला। कुछ दसा में, इनहन के इस्तमाल एल्कोहल वाला पेय के साथ मिला के काकटेल बनावे में भी कइल जाला।

संदर्भ[संपादन]

  1. "Electronic Code of Federal Regulations". यूनाइटेड स्टेट्स सरकार. पहुँचतिथी 25 फरवरी 2011. देखीं §7.71, पैरा (e) आ (f).
  2. "What Is Meant By Alcohol-Free? : The Alcohol-Free Shop". Alcoholfree.co.uk. 2012-01-08. पहुँचतिथी 2013-03-26.
  3. Jed Portman (2013-01-11). "Have You Ever Tried Hot Dr. Pepper? | Serious Eats: Drinks". Drinks.seriouseats.com. पहुँचतिथी 2013-05-08.