रंग

विकिपीडिया से
रंगीन पेंसिल

रंग (अंग्रेजी: Color) एगो गुणधर्म हवे जौना के आदमी लाल, पीयर, हरियर नियर कई सारा आलग-अलग प्रकार की रूप में पहिचाने ला। रंग के सीधा संबंध प्रकाश या रोशनी से होखे ला, काहें से कि प्रकाश के अलग-अलग वेवलेंथ वाला हिस्सा आदमी के अलग-अलग पहिचान में आवेला। आदमी की आँख में रेटिना पर प्रकाश के पहिचान करे वाला नखी-नखी संवेदनशील कोन होखेलें जिनहन के अलग-अलग वेवलेंथ के प्रकाश अलग-अलग मात्रा में एक्टिव करे ला आ एही संवेदना से आदमी के रंग के पहिचान होला।

हालाँकि रंग के भौतिक गुण आ एकर आदिमी की द्वारा पहिचान में बहुत जटिल संबंध बाटे।

रंग के अलग अलग तरीका से गणितीय रूप में भी चिन्हित करे के तरीका बनावल गइल बाटे जौना में सबसे प्रमुख RGB सिस्टमCMYK सिस्टम बाटे। एकरी अलावा HSV या HSB कलर स्पेस भी परिभाषित कइल बाटे। इहो धियान में रखे वाली बाति बाटे की एगो सिस्टम में रंग के पहिचानक के दुसरा सिस्टम की पहिचानक में बदले के कौनों बहुत सीधा गणितीय तरीका न होखे ला।

रंग के अध्ययन करे वाला बिज्ञान के कलरीमीट्री कहल जाला या कबो-कबो सीधे रंग बिज्ञान (colour science) भी कहल जाला।

कलर स्पेस[संपादन करीं]

रंग के भौतिक रूप से पहिचान करे खातिर कई गो तरीका बनावल गइल बाटें जेवना कई आधार पर अलग-अलग रंग के गणितीय पहिचान दिहल जा सकेले। ई पहिचान एक तरह के निर्देशांक होला आ इन्हन के पुरा समूह के कलर स्पेस कहल जाला। नीचे इन्हन के मुख्य परकार दिहल गइल बाटे:

आरजीबी (RGB)[संपादन करीं]

जोड़क या आरजीबी रंग मिक्सिंग

सबसे आसान आ प्रमुख कलर स्पेस बाटे। ई प्रकाश के तीन गो मुख्य रंग - लाल, हरा आ नीला की जोड़ से बाकी रंग बनावे की कला पर आधारित बाटे आ एह सिस्टम में कौनों रंग के चीन्हा ई बतावेला की केतना लाल, केतना हरियर आ केतना नीला रंग के प्रकाश के मिला के ऊ रंग बतावल जा सकत बाटे। 8-बिट (8-bit) सिस्टम में 0 से 255 की बीच में तीनों रंग के वैल्यू बतावल जाले।

एकर इस्तेमाल मुख्य रूप से ओ सगरी सिस्टम में होखेला जेवन सीधे प्रकाश पैदा कइ के अलग अलग रंग के चीज देखावेला। सबसे नीक उदाहरण टीवी या कम्यूटर के स्क्रीन बाटे। एह स्क्रीन कुल पर लउके वाली हर चीज के रंग अलग-अलग वेवलेंथ के प्रकाश के मिक्स कइ के बनल रहेला।

चूँकि, ई सिस्टम सीधे प्रकाश के जोड़ से रंग बनावेला, एही से एकरा के जोड़क रंग ब्यवस्था (Additive color system) कहल जाला।

सीएमवाईके (CMYK)[संपादन करीं]

घटावक या सीएमवाईके रंग मिक्सिंग

आरजीबी की ठीक उल्टा ई ब्यवस्था सफेद प्रकाश के परावर्तित करे वाला सतह पर क्रम से सियान, मैजेंटापीला (+काला) रंग के सियाही लगा के उन्हन की द्वारा अलग अलग रंग बनावे के तरीका पर आधारित बाटे। कौनों सफेद कागज सगरी रंग के प्रकाश परावर्तित करे ला एही से ऊ सफेद लउके ला। अगर ओपर लाल सियाही लगा दिहल जाय त ऊ लाल लउके लागी जौना के मतलब ई भइल की लाल सियाही नीला आ हरा रंग के प्रकाश के सोख ले लेले आ उन्हन के ना परावर्तित होखे देले। एही तरे नीला सियाही लाल आ आ हरा रंग के प्रकाश के सोख लेले।

एकर मुख्य इस्तेमाल छपाई में होखेला जहाँ चार गो रंग के सियाही सियान, मैजेंटा, पीला आ काला (CMYK) की सहायता से सगरी रंगीन चीज छापल जाला। चूँकि, अलग अलग सियाही अलग अलग रंग की प्रकाश के घटा (सोख के) बाकी बचल प्रकाश से रंग बनावे ले एही से एकरा के घटावक (Subtractive color system) भी कहल जाला

एचएसवी (HSV)[संपादन करीं]

एचएसवी कोन

ई एगो दूसर ब्यवस्था बाटे जौना में रंग के प्रकार के ह्यू (hue), ओकरी गहिराई या हल्कापन के सैचुरेशन (saturation) आ ओकरी शुद्धता या चटक होखला के वैल्यू (value) की रूप में परिभाषित कइल जाला।

एही से मिलत-जुलत एगो अउरी ब्यवस्था ह्यू-सैचुरेशन-ब्राइटनेस (HSB) के भी होखे ले। आ इन्हन की अलावा अउरी कई गो रंग ब्यवस्था बाटे।

संदर्भ[संपादन करीं]

बाहरी कड़ी[संपादन करीं]