वीडियो कॉलिंग

वीडियो कॉलिंग वीडियोटेलीफोनी (जेकरा के वीडियो कॉन्फ्रेंसिंग या वीडियो कॉल भी कहल जाला) ऑडियो आ वीडियो के इस्तेमाल से एके साथ दू तरफा कम्युनिकेशन (बातचीत) के तरीका ह। आज के समय में वीडियोटेलीफोनी बहुते आम हो गइल बा। एकरे खातिर कई गो शब्द इस्तेमाल होखेलें। वीडियोफोन ऊ अलग से बनल डिवाइस हवे जवन खास वीडियो कॉलिंग खातिर होला (जइसे टेलीफोन होला)। अब के जमाना में स्मार्टफोन आ कंप्यूटर जइसन डिवाइस में वीडियो कॉलिंग के सुविधा आ चुकल बा, जवना से अलगा से वीडियोफोन के जरूरत घट गइल बा। वीडियो कॉन्फ्रेंसिंग से मतलब बा समूह में बातचीत करे के तरीका। ई तकनीक 'टेलीप्रेजेंस' में भी इस्तेमाल होखेला, जवना के मकसद बा कि दूर-दराज के लोग के अइसन अनुभव होखे मनो सब लोग एके कमरा में बइठल होखसु।

वीडियोटेलीफोनी के विचार उन्नीसवीं सदी के आखिरी समय में सोझा आइल, आ 1930 के दशक में ई सार्वजनिक रूप से उपलब्ध हो गइल। शुरुआती दौर में एकरा के डाकघर में बूथ लगाके देखावल गइल आ अलग-अलग अंतरराष्ट्रीय प्रदर्शनी में प्रदर्शन कइल गइल। सन् 1970 में AT&T पहिला कामर्शियल व्यक्तिगत वीडियोफोन सिस्टम लॉन्च कइलस। वीडियोफोन के अलावा इमेज फोन भी रहे, जे हर कुछ सेकंड में परंपरागत टेलीफोन लाइन के जरिए स्थिर इमेज सभ के अदला-बदली करत रहे। 1990 के आखिरी दशक में एडवांस वीडियो कोडेक्स, ताकतवर CPU आ तेज इंटरनेट सर्विस के बिकास से डिजिटल वीडियोफोन के मदद से सस्ता, बढ़िया रंगीन वीडियो सेवा दुनिया के लगभग कतहूँ उपलब्ध होखे लागल।

वीडियोटेलीफोनी के उपयोग में बहिरा आ बोल-चाल में कठिनाई झेले वाला लोग खातिर सांकेतिक भाषा के ट्रांसमिशन, दूरस्थ शिक्षा, टेलीमेडिसिन आ आवाजाही से जुड़ल दिक्कतन के दूर करे के सुविधा शामिल बा। समाचार मीडिया संस्थान एकरा के प्रसारण खातिर भी इस्तेमाल करत बाड़ें।