गूगल मीट

Google Meet

Screenshot  गूगल मीट के स्क्रीनशॉट
डेवलपर	गूगल
शुरुआती रिलीज	मार्च 9, 2017 (2017-03-09)
रिपोजिटरी	github.com/googleworkspace
ऑपरेटिंग सिस्टम	Android 6+ iOS 18+ ChromeOS Fuchsia Web Discontinued Android TV
एकरा पहिले	गूगल डुओ गूगल हैंगआउट्स
किसिम	कम्युनिकेशन सॉफ्टवेयर
लाइसेंस	फ्रीमियम
वेबसाइट	meet.google.com

गूगल मीट गूगल कंपनी द्वारा बनावल एगो बीडियो कम्युनिकेशन सर्विस हवे। ई ओह दू गो ऐप में से एगो हवे जे गूगल हैंगआउट्स के जगह लेवे खातिर बनावल गइल रहे। दूसरका ऐप गूगल चैट हवे। 1 नवंबर 2022 से आम लोग खातिर इस्तेमाल होखे वाला गूगल डुओ के जगह गूगल मीट ले लिहलस। एह दौरान डुओ के मोबाइल ऐप के नाम बदल के मीट रख दिहल गइल, जबकि पुरान मीट ऐप के धीरे-धीरे बंद करे के फैसला कइल गइल।

कोविड-19 महामारी के शुरुआती महीना में गूगल घोषणा कइलस कि अब गूगल मीट खाली भर गूगल वर्कस्पेस के इस्तेमाल करे वाला लोग खातिर ना, बल्कि सभे यूजर लोगन खातिर उपलब्ध रही। पहिले ई सुबिधा सिर्फ गूगल वर्कस्पेस के यूजर लोगे तक सीमित रहे। जनवरी से अप्रैल 2020 के बीच गूगल मीट के इस्तेमाल लगभग 30 गुना बढ़ गइल। अप्रैल 2020 तक हर दिन करीब 10 करोड़ लोग गूगल मीट के इस्तेमाल करे लागल जबकि ज़ूम एप के रोजाना लगभग 20 करोड़ उपयोगकर्ता रहलें।

फीचर

वर्कस्पेस अकाउंट

गूगल वर्कस्पेस खाता इस्तेमाल करे वाला उपयोगकर्ता लोग खातिर कुछ अतिरिक्त सुविधा उपलब्ध बा:

• गूगल वर्कस्पेस स्टार्टर उपयोगकर्ता एक कॉल में अधिक से अधिक 100 लोग जोड़ सकेलें।
• गूगल वर्कस्पेस बिजनेस उपयोगकर्ता एक कॉल में 150 लोग तक जोड़ सकेलें।
• गूगल वर्कस्पेस एंटरप्राइज उपयोगकर्ता एक कॉल में 250 लोग तक जोड़ सकेलें।
• कुछ चुनल देस में उपलब्ध डायल-इन नंबर के मदद से फोन द्वारा मीटिंग में शामिल होखे के सुविधा।
• मीटिंग के रिकॉर्ड करे के सुविधा।
• गूगल वर्कस्पेस एंटरप्राइज उपयोगकर्ता खातिर पासवर्ड से सुरक्षित डायल-इन नंबर।
• बोले गइल बात के आधार पर रीयल-टाइम क्लोज्ड कैप्शन (बोली के अपने-आप लिखल रूप) देखावे के सुविधा।
• पृष्ठभूमि धुँधला (ब्लर) करे आ आभासी पृष्ठभूमि (वर्चुअल बैकग्राउंड) लगावे के सुविधा।
• अपने-आप बनल क्लोज्ड कैप्शन के रीयल-टाइम अनुवाद देखे के सुविधा।

मार्च 2020 में, कोविड-19 महामारी के समय गूगल कुछ समय खातिर गूगल वर्कस्पेस एंटरप्राइज में मिलल एडवांस सुविधा के गूगल वर्कस्पेस आ जी सूट फॉर एजुकेशन इस्तेमाल करे वाला सभे उपयोगकर्ता खातिर उपलब्ध करा दिहलस। बाद में, जनवरी 2022 में, ई अतिरिक्त सुविधा हटा दिहल गइल। ओकरा बाद ई सुविधा खाली ओह लोग खातिर उपलब्ध रहल जे एकर सदस्यता (सब्सक्रिप्शन) लिहल रहे।

पर्सनल अकाउंट

मार्च 2020 में गूगल गूगल मीट के सुविधा निजी (मुफ्त) गूगल खाता वाला सभे यूजर लोगन खातिर उपलब्ध करा दिहलस। मुफ्त गूगल मीट कॉल में खाली एके गो होस्ट हो सकेला आ अधिक से अधिक 100 लोग शामिल हो सकेलें। एहिजा, गूगल वर्कस्पेस के यूजर लोग एक कॉल में 250 लोग तक जोड़ सकेला, जबकि गूगल हैंगआउट्स में ई सीमा 25 लोग के रहे। कारोबारी (कॉमर्शियल) इस्तेमाल खातिर होखे वाला मीट कॉल के रिकॉर्ड कइल जा सकेला आ सुरक्षित रखल जा सकेला, लेकिन आम यूजर के मीट कॉल ना त रिकॉर्ड कइल जाला आ ना सुरक्षित रखल जाला। गूगल के कहनाम बा कि आम यूजर के मीट से मिलल जानकारी के विज्ञापन देखावे खातिर इस्तेमाल ना कइल जाला।