अत्त दीपो भव

अत्त दीपो भव भा अप्प दीपो भव^[1] बौद्ध परंपरा में, भगवान् बुद्ध के अंतिम बचन के रूप में कोट कइल जाये वाला सूत्रवाक्य ह। ई तिपिटक में संकलित "महापरिनिब्बाण सुत्त" (महापरिनिर्वाण सूत्र) में आइल बतावल जाला। एकर संस्कृत छाया होखे ला "आत्म दीपो भव" आ अंग्रेजी में ई दू तरीका से अनुबाद कइल जाला - "बी अ लाईट ऑनटू युअरसेल्फ़"^[2] चाहे "बी युअर ओन लैम्प"।^[3] मोटा-मोटी एकर अनुबाद होखी "आपन दिया खुद बनऽ"।

कुछ बिद्वान एह में दीप शब्द के अरथ टापू वाला दीप के लेला आ एह वाक्य के अरथ एही अनुसार करे ला - "कि आपन दीप (एकाकी, बाकी दुनिया से अलग) खुद बनऽ, अपना खुद के सरन में रहऽ।"

ओशो रजनीश अपना प्रवचन सभ में बेर-बेर बुद्ध के संबंध में एह वाक्य के कोट करे लें। पिपरहवा के अवशेष सभ के भारत वापिस लियावे के बाद जनता के संबोधन में तत्कालीन भारतीय प्रधानमंत्री नरेंद्र मोदी अपना भाषन में एह सूत्रवाक्य के कोट कइलन।^[4]

ई उत्तर प्रदेश के सिद्धार्थ नगर जिला में स्थित सिद्धार्थ विश्वविद्यालय के मोटो हवे।